La organización d'esquierda soberanista sorrayó, nel saludu fechu na única manifestación convocada pal 8 de setiembre, la necesidá d'articular conxuntamente movilizaciones nes que tean presentes les estremaes visiones del movimientu, afitando qu'esti tien que ser "l'últimu añu nel que la esquierda nacional cellebre dixebrada actos reivindicativos".
Asinamesmo, Fai! quixo recordar que "pueblu asturianu tien feches muncho más significatives nes que salir a les cais, no qu'a les nuestres reivindicaciones se refier, qu'esti día patronal y d'autocomplacencia institucional".
Fai!, al traviés d'un miembru que lleó un testu, quixo aprovechar el convite que dende les y los organizadores de la manifestación que percorrió les cais d'Uviéu güei 8 de setiembre se fizo pa unviar un saludu nesti día señaláu. Dende Fai! esperamos que, en movilizaciones vinientes, seya realmente posible la cellebración d'actos unitarios nos que pueda participar activamente la nuestra organización xunto a munches otres, col enfotu de denunciar les deficiencies que carez Asturies, asina como pa plantegar una alternativa de modelu económicu, social y identitariu pal país.
Ensin más, dexámosvos col vidiu y el testu de la intervención del compañeru de Fai!.
Estimaos y estimaes compañeros y compañeres,
un añu más, les asturianes y asturianos atopámonos énte un 8 setiembre nel que poco hai que cellebrar. L'actitú antiasturiana y servil de los partíos mayoritarios qu'operen n'Asturies queda espeyada nel so nulu interés por dotar a esti país de ferramientes que permitan que la soberanía resida realmente nel pueblu asturianu, el cual debiere ser l'únicu depositariu de la mesma, de cara a decidir el so futuru coleutivu con total llibertá.
Asturies alcuéntrase, anguaño, nuna situación de coma inducíu. La falta de democracia efectiva, la negación de los derechos nacionales, sociales y llingüísticos, la estroza ambiental, la corrupción y el clientelismu políticu, la continuidá d'esti sistema patriarcal y la represión de cualquier movimientu disidente del marcu afitáu pol poder, son constantes que, dende'l sistema capitalista y centralista que carecemos, se nos imponen a diario.
Énte esta situación crítica, el movimientu d'emancipación social y nacional asturianu nun puede quedar estáticu. Ye hora de construyir y texer una rede ente los estremaos movimientos sociales que defendemos un cambiu nel modelu de país pa que les nuestres demandes seyan visibles en tolos ámbetos de la sociedá.
Dende Fai! creemos qu'esti 2008, el del 200 aniversariu de la soberanía asturiana de la Xunta Xeneral y la creación de la bandera nacional, tien que ser l'últimu añu nel que la esquierda soberanista cellebre dixebrada actos de reivindicación como esti. La nuesa organización considera que, namás asina, axuntando esfuerzos y voces na pluralidá del movimientu, podremos da-y, realmente, otra traza a esti país.
Poro, Fai! quier agradecer la posibilidá que nos ufren los y les convocantes de la manifestación pa lleer estes llínies. Per otru llau, queremos afitar, una vegada más, el nuestru compromisu con cualisquier tipu d'iniciativa unitaria, coordinada y organizada de manera que podamos participar toes y toos, recordando, asinamesmo, que'l pueblu asturianu tien feches muncho más significatives nes que salir a les cais, no qu'a les nuestres reivindicaciones se refier, qu'esti día patronal y d'autocomplacencia institucional.
Gracies y munchos ánimos, una vegada más, a tola xente que, dende estremaos sectores de la sociedá, llucha pola consecución d'una Asturies xusta y llibre nun mundu xustu de pueblos llibres. La nuestra causa merezlo.
¡PUXA ASTURIES LLIBRE Y SOCIALISTA!
[*+ ]
Esbilla
del.icio.us
